蕭正楠同黃翠如拍拖三年多已認定對方為結婚對象,早前盛傳兩人旅行結婚,但翠如近排又自言未傾過婚事。儘管蕭、黃口密,而兩人的共同好友曹永廉則爆料,稱阿蕭同翠如已秘密結婚,令網民起閧。不過,阿蕭接受傳媒訪問時回覆指信:“信佢(曹永廉)一成,雙目失明!”
事緣本周一(16日)曹永廉52歲生日,仍在美國登台的他,獲蕭正楠在微博隔空送祝福:“10月16日又到了!全港熱烈祝賀老廉更年期依然老當益壯、但願重振雄風!去美國登台只有精叻永無jet lag,唱歌唔走音,唔會俾人扔爛蕃茄!”
係阿廉嘅生日願望
曹永廉接著轉發並回應蕭正楠:“你隻蕉真係成熟咗,講嘢無咁口臭,積到啲口德,結咗婚係唔同啲。”網民急問阿廉真定假?亦有人話“幾時結咗婚又唔通知!”
不過,蕭正楠昨日接受傳媒訪問時,回覆大家指信阿廉一成,雙目失明,他與翠如結婚是阿廉的生日願望:“呢個係佢嘅生日願望,(咁你會唔會實現佢嘅願望?)講咗出嚟就唔靈!”
曹永廉接受傳媒訪問時亦自稱是開玩笑,想不到迴響如此大:“冇呀,我喺微博玩佢之嘛,點知迴響咁大,嘿嘿嘿,微博啲人個個都以為係真嘅……好多人問我係咪真,我話唔係呀,反而咁樣我仲煩咗口忝。”阿廉又再三叮囑:“唔好當係真,我希望啫!我都希望講多啲,咁佢哋就結婚㗎喇。”
翠如犧牲婚期爭視后
黃翠如最近在熱播劇《使徒行者2》展現更上一層的演技,不但在結局篇其中一集由頭喊到落尾,更以“洋葱式”演法每次喊出不同味道,連同劇的苗僑偉都忍不住大讚她有力問鼎視后!而無線亦打算力谷她,安排她在台慶劇《溏心風暴3》和《誇世代》亮相,以增加曝光率提高贏面,但間接使她犧牲婚期,估計同蕭正楠結婚仲要等多排。