賭王何鴻燊與“四太”梁安琪的大仔何猷亨，跟無線小花陳瀅分手一年多，依然維持再見亦是朋友的好關係，日前二人被發現在國慶日合體睇煙花。不過，同陳瀅份屬好姊妹的歌手糖妹（黃山怡），昨日到電台宣傳新歌時，指好友仍是單身，而10月16日踏入30歲生日的她，笑言生日願望是希望“脫Dry”。

糖妹昨日到電台宣傳新歌《一起不一起》，適逢10月16是她30歲生日，主持人於是為她送上生日蛋糕。自2013年與何浩文甩拖後，糖妹就沒有桃花埋身，她笑言生日願望是“脫Dry”：“我唔認係30歲，只係18歲，開始步入譚校長（譚詠麟）狀態。第一次收到電台蛋糕，真係好開心。（收獎開心啲？）如果係就好喇。”並透露冇計過單身多少年，糖妹說：“都希望一擊即中，我係指搵老公。（生仔？）一次過啦。”
透露好姊妹仲係單身
對於日前有報道指好姊妹陳瀅被指與何猷亨翻撻，糖妹說：“肯定唔係，佢係單身，我已經打咗電話問佢，佢仲話發夢見到我好多人媾。（現實都係？）未有，我個圈子好細，依家同姊妹食親飯，佢哋嘅話題都係要介紹男仔畀我，好無奈畀人擺上枱。”糖妹坦言有拖拍必公開，她說：“你估我唔想拍拖？如果有嘅話一定會大事宣傳我有BB（指男朋友）。（叫男友做BB咁嘔心？）係呀，有咁嘔心得咁嘔心。”
缺席陳嘉寶婚禮
講到她日前缺席好姊妹陳嘉寶的婚前派對，糖妹說：“要做嘢，同埋出席唔到佢嘅婚禮，佢嬲嬲豬我，因為要去台灣做騷，謝罪、謝罪。”糖妹在無線劇《女人俱樂部》認識到一班好閨蜜，除陳瀅同陳嘉寶之外，還有賴慰玲、王敏奕及吳嘉熙。如今陳瀅同猷亨被傳復合，而陳嘉寶下月嫁半億闊少黃頌祈，賴慰玲就未婚陀B，上月終於簽紙成為人妻；吳嘉熙今年7月宣佈與夏雨兒子黃奕晨拍拖，至於王敏奕就與曾志偉兒子曾國祥拍拖多年，不時被影到拍拖放閃，難怪糖妹要說生日願望是想搵到男朋友。