蜜運中的鍾欣潼(阿嬌)早前在台灣與賀軍翔(小美)合作新劇《動物系戀人啊》,阿嬌更因為台灣之行而認識新歡“醫界王陽明”男友賴弘國。不過,近日有劇組人員爆料,指阿嬌在煞科前的一場戲,因她中途要飛往內地參加商演,之後再趕回來續拍,可能太疲累,沒有背好劇本而頻頻NG,激嬲賀軍翔當場爆粗,阿嬌忍不住痛哭。
阿嬌透過經理人霍汶希(Mani)解釋:“阿嬌因為做完演唱會,即刻飛返台灣拍劇,佢有廿幾個鐘頭冇瞓過,嗰日佢係好攰,其實嗰場戲係冇對白嘅,只係餵小美食Cream,但阿嬌太攰聽唔到導演話將Cream放落小美個口,佢放咗落佢塊面,因為咁樣影響咗拍攝進度,所以阿嬌自責而喊,絕對唔係因為台詞問題,小美絕對冇鬧佢,阿嬌因為呢件事已經同劇組、導演、小美致歉,因為佢喊到收唔到聲,嗰日拍唔到,佢覺得好唔好意思。”